English
Монгол Улсын сайд, ЗГХЭГ-ын дарга Н.Учрал Бүгд Найрамдах Энэтхэг Улсаас Монгол Улсад суугаа Онц бөгөөд бүрэн эрхт Элчин сайд Атул Малхари Готсурвег өнөөдөр (2024.10.14) төрийн ордонд хүлээн авч уулзав.
Уулзалтаар талууд хоёр улсын харилцаа, хамтын ажиллагааг цаашид өргөжүүлэн хөгжүүлэх, ялангуяа Монгол-Энэтхэгийн нөхөрлөлийн бэлгэ тэмдэг болсон Газрын тос боловсруулах үйлдвэр, Кибер аюулгүй байдлын сургалтын төв болон Монгол-Энэтхэгийн найрамдлын дунд сургууль байгуулах зэрэг томоохон ажлуудыг урагшлуулахад хамтран ажиллах асуудлаар санал солилцов.
Сайд Н.Учрал Засгийн газрын үйл ажиллагааны хөтөлбөрт төрийн албаны шинэчлэлийг эрчимжүүлэх, дэд бүтэц, бүтээн байгуулалтын 14 мега төслийг хэрэгжүүлэх зэрэг зорилтыг дэвшүүлснийг дурдаад энэ хүрээнд Бүгд Найрамдах Энэтхэг Улстай ойр дотно хамтран ажиллахад бэлэн байгаагаа илэрхийлэв. Түүнчлэн хоёр орны хамтран хэрэгжүүлж буй Газрын тос боловсруулах үйлдвэрийг байгуулах төслийг урагшлуулахад дэмжлэг үзүүлж, хамтран ажиллахыг Элчин сайдаас хүсэв.
Элчин сайд Атул Малхари Готсурве хоёр улсын харилцаа, хамтын ажиллагааны чухал асуудлуудаар санал солилцсондоо баяртай байгаагаа илэрхийлж, хоёр орны харилцаа, хамтын ажиллагааг олон салбарт өргөжүүлэн хөгжүүлэх, Газрын тос боловсруулах үйлдвэр зэрэг хамтарсан томоохон төс лүүдийг урагшлуулахын төлөө ажиллаж буйгаа илэрхийлэв.
Монгол Улсын сайд, ЗГХЭГ-ын дарга Н.Учрал Бүгд Найрамдах Франц Улсаас Монгол Улсад суугаа Элчин сайд Коринн Пэрера Да Силваг өнөөдөр (2024.10.10) төрийн ордонд хүлээн авч уулзав.
Сайд Н.Учрал Цахим хөгжил, харилцаа холбооны сайдаар ажиллах хугацаандаа Үндэсний хиймэл дагуулыг Бүгд Найрамдах Франц Улстай хамтран бүтээх ажлыг эхлүүлсэн. Өдгөө ЗГХЭГ-ын даргын хувиар дээрх ажлыг үргэлжлүүлэн хариуцахын сацуу, Монгол, Францын Засгийн газар хоорондын хамтарсан комиссын Монголын хэсгийн дарга, мөн “Зөөвч Овоо” Ураны төслийн Монголын талын Ажлын хэсгийг ахлан ажиллаж байгаагаа дурдав.
Мөн өнгөрсөн онд хоёр орны Төрийн тэргүүн нар анх удаа харилцан айлчилсан нь Монгол, Францын харилцаанд чухал түүхэн үйл явдал болсныг онцолж, энэ үеэр талуудын харилцан тохирсон Үндэсний хиймэл дагуул болон “Зөөвч овоо” ураны төслүүдийг үр дүнтэй хэрэгжүүлэхэд онцгой анхаарч байгаагаа илэрхийлэв.
Үндэсний хиймэл дагуулын төслийг хэрэгжүүлэх ажлын хүрээнд БНФУ-ын талтай хэлэлцээ хийх, зээлийн ерөнхий нөхцөлийн талаарх олон улсын гэрээ байгуулах ажлыг 2024 онд багтаан дуусгах, шаардлагатай газрын станцуудын байршилд судалгаа хийж эцэслэх зэрэг ажлууд дээр төлөвлөгөө гарган ажиллаж байгаа юм.
Элчин сайд Коринн Пэрера Да Силва хоёр орны харилцаа, хамтын ажиллагаа идэвхтэй өрнөж, иргэд хоорондын харилцан ойлголцол нэмэгдэж, түүхэн томоохон төслүүд хэрэгжиж, бодит үр дүн гаргахын төлөө идэвхтэй хамтран ажиллахаа илэрхийлэв.
Монгол Улсын сайд, ЗГХЭГ-ын дарга Н.Учрал өнөөдөр (2024.10.10) Удирдлагын академийн түүхт 100 жилийн ойн хүрээнд зохион байгуулагдаж буй Олон улсын Эрдэм шинжилгээний хурлыг нээж үг хэллээ.
Удирдлагын академи бол Монгол Улсын шинэ цагийн түүхэн хөгжлийн үе шат бүрт салбар бүрийн удирдах ажилтан, манлайлагчид, мэргэшсэн төрийн албан хаагчдыг сургаж, хөгжүүлэх чиг үүргээ амжилттай хэрэгжүүлж ирсэн Монгол төрийн хамгийн чухал институтийн нэг юм.
Гаднын найман улсын Удирдлагын академийн хамтын ажиллагаатай судалгаа, эрдэм шинжилгээ, сургалтын байгууллагын эрдэмтэн судлаачид өнөөдөр “Төрийн захиргааны уламжлал, шинэчлэл: Монголын онцлог, олон улсын туршлага” сэдвийн хүрээнд хуралдаж, өнөөдрийг хүртэлх хугацаанд Монгол Улсын төрийн албан хаагчдад мэдлэг түгээх үйл хэргийн үр дүнг хэлэлцэж байна.
Сайд Н.Учрал “Засгийн газрын 2024-2028 оны Үйл ажиллагааны хөтөлбөрт Төрийн албаны реформ хийх зорилт тэргүүлэх асуудлын нэг болж туссан. Төрийн алба “мэргэшсэн” байх ёстой, түүнчлэн улс төрийн томилгооноос ангид, тогтвортой байх зарчмыг хэрэгжүүлэхийн тулд “мерит” зарчмыг удирдлагаа болгодог. Гэвч “мерит” буюу “чадахуйн” зарчим гэдэг ойлголт өнөөдөр хувьсан өөрчлөгдөж байна. Бид ч энэ хувьсан өөрчлөлтийг соргогоор мэдэрч цаашид төрийн албыг илүү чадварлаг, илүү уян хатан, илүү шинэлэг болгон өөрчилж шинэчлэх шаардлагатай байна. Монгол Улсын Засгийн газраас зорьж буй Төрийн албаны реформын их үйлс нь цаашдын Шинэ 30 жилийн хамгийн том сорилтуудын нэг байх нь гарцаагүй юм. Энэ сорилтын урт замд хамгийн хүнд ачааг үүрэлцэж, чухал үүрэг гүйцэтгэж оройлон манлайлах институт бол та бүхэн буюу Удирдлагын академи байх болно гэж итгэж байна” гэдгийг онцолсон юм.
Удирдлагын академийн үе үеийн удирдлага, багш, оюутнууд, нийт төгсөгчдөд түүхт 100 жилийн ойн баярын мэнд хүргэе.
Ерөнхий сайд Л.Оюун-Эрдэнэ зүүн бүсийн автозамын бүтээн байгуулалттай танилцлаа.
Улаанбаатар-Чингис хот чиглэлийн авто замаас Жаргалтхаан-Өмнөдэлгэр сум хүртэлх 52,5 км хатуу хучилттай авто замын эхний хэсгийг ашиглалтад орууллаа. Энэхүү зам нь Хэнтий аймгийн Жаргалтхаан, Өмнөдэлгэр, Биндэр, Баян-Адарга, Норовлин, Дорнод аймгийн Баян-Уул сумд, Ульхан боомт чиглэлийн авто замын нэг чухал холбоос болно. Замын бүтээн байгуулалтыг “Тэгш плант” ХХК гүйцэтгэж байгаа бөгөөд энэ сардаа багтаан бүрэн ашиглалтад оруулахаар ажиллаж байна.
Монгол Улсын Засгийн газраас анх удаа 2025 оны төсвийг бүсчилсэн хөгжил рүү чиглүүлэн боловсруулж, эдийн засгийн өндөр ач холбогдолтой дэд бүтцийн томоохон төслүүдэд хөрөнгө оруулалт хийхээр УИХ-д өргөн барьсан. Зүүн бүс нутгийн хувьд түүхэн аялал жуулчлал, төрөлжсөн, эрчимжсэн мал аж ахуйн дэд бүс нутаг хэмээн Засгийн газар зарласан бөгөөд Ульхан боомтоор ОХУ-тай, Хавирга боомтоор БНХАУ-тай холбогддог газар зүйн байршлаараа ч эдийн засгийн интеграцид орох бүрэн боломжтой бүс нутаг. Ерөнхий сайд Л.Оюун-Эрдэнэ Улаанбаатар-Чингис хот чиглэлийн авто замаас Жаргалтхаан-Өмнөдэлгэр сум хүртэлх энэхүү хатуу хучилттай авто зам нь Зүүн бүсийн түүхэн аялал жуулчлалын алтан гурвалжин, зүүн аймгуудыг ОХУ-ын Ульхан боомттой холбох гол зангилаа холбоос замуудын нэг хэсэг болж буйг онцлоод цаашид зүүн аймгууд болон хилийн боомтуудыг бүсчилсэн хөгжлийн бодлогын дагуу эдийн засгийн ач холбогдлоор нь авто замаар холбох бодлогыг Засгийн газар барьж буйг хэллээ.
Бурхан халдун хайрхан, Балдан брэйвэн хийд оршдог Өмнөдэлгэр сум хүртэлх энэхүү авто зам нь Тэмүүжинг Чингис хаанд өргөмжлөн Их Монгол Улсыг байгуулж, Их хуралдай анх хуралдсан Биндэр сум, Их Эзэн чингис хааны төрсөн нутаг Дэлүүн болдог оршдог Дадал сум, Монгол төрийн их заргач Шихихутагийн төрсөн нутаг Норовлин сум хүртэлх авто замын эхлэл хэсэг төдийгүй түүхэн аялал жуулчлалын тойрог замын нэг хэсэг гэдгээрээ онцлогтой. Зүүн бүс нутгийн түүхэн газар нутгуудыг дэд бүтцээр холбосноор хувийн хэвшлийнхэн, хөрөнгө оруулагчид, гадаад, дотоодын иргэдийг татах чухал ач холбогдолтой юм.
Зүүн бүсийн Хэнтий, Дорнод, Сүхбаатар аймгууд түүхэн, байгаль, соёлын аялал жуулчлалын арвин нөөцтэйгөөс гадна Ульхан, Эрээнцав, Хавирга, Баянхошуу, Сүмбэр, Бичигт зэрэг хуурай замын зургаан боомттой. Засгийн газраас эдийн засгийн идэвхтэй бүс болгохоор зүүн босоо тэнхлэгийн дагуу Бичигт-Эрээнцавыг төмөр замаар холбож, мөн авто замаар Ульхан, Баян-Уул, Чингис, Бор-Өндөр, Замын-Үүд гэсэн зүүн босоо чиглэлд авто замаар холбохоор төлөвлөн ажиллаж байна.
Улс орны хөгжилд үнэтэй хувь нэмэр оруулах энэхүү авто замын бүтээн байгуулалтын ажлыг цаг хугацаанд нь амжилттай гүйцэтгэж буй автозамчид болон орон нутгийнханд Ерөнхий сайд талархал илэрхийллээ.
Монгол Улс “Мянганы зам”-ын бүтээн байгуулалтын хүрээнд 7,000 км авто замыг тавихад 21 жил зарцуулж байсан бол бүсчилсэн хөгжлийн суурийг тавьж, аймгийн төвүүдийг хооронд нь болон хилийн боомтуудтай холбохын тулд ирэх дөрвөн жилд 4,440 км орчим авто зам барихаар төлөвлөсөн. Үүнээс ирэх жил зүүн бүсэд 864.8 км авто замын төсөл хэрэгжүүлэхээр төлөвлөж байна.
Монгол Улсын сайд, ЗГХЭГ-ын дарга Н.Учрал Их Британи, Умард Ирландын Нэгдсэн Хаант Улсаас Монгол Улсад суугаа Элчин сайд Фиона Блайтыг өнөөдөр (2024.10.04) төрийн ордонд хүлээн авч уулзав.
Уулзалтын эхэнд Сайд Н.Учрал Их Британи, Умард Ирландын нэгдсэн хаант улстай хөгжүүлж буй харилцаа, хамтын ажиллагааг бүх салбарт өргөжүүлэн хөгжүүлэх нь Монгол Улсын гадаад бодлогын тэргүүлэх зорилтуудын нэг болохыг онцлон тэмдэглэв.
Мөн Их Британи, Умард Ирландын Нэгдсэн Хаант Улсын Гадаад хэрэг, хамтын нөхөрлөл, хөгжлийн сайд Дэвид Камероны өнгөрсөн дөрөвдүгээр сард Монгол Улсад хийсэн албан ёсны айлчлал нь хоёр улсын харилцааны түвшнийг ахиулж, “Иж бүрэн түншлэл”-ийн түвшинд хүргэх суурийг тавьсан чухал ач холбогдолтой үйл явдал болсныг тэмдэглэв. Айлчлалын үеэр Британийн Засгийн газраас англи хэлний багш бэлтгэх, цахим сургалтын хөтөлбөр хэрэгжүүлэхэд 10 сая фунт стерлингийн буцалтгүй тусламж үзүүлэхээр болсонд талархал илэрхийлж, бодит ажил хэрэг болгоход дэмжиж ажиллахаа илэрхийлэв.
Талууд цаашид кэмбриджийн хөтөлбөртэй болон Британийн магадлан итгэмжлэх үндэсний зөвлөлөөр олон улсад магадлан итгэмжлэгдсэн сургуулиудын тоог нэмэх, дэлхийн боловсролыг ойртуулахад хамтран ажиллахаар санал нэгдэв.
Монгол Улсын сайд, ЗГХЭГ-ын дарга Н.Учрал Европын сэргээн босголт, хөгжлийн банкны суурин төлөөлөгч Ханнес Такачийг өнөөдөр (2024.10.01) хүлээн авч уулзав.
Уулзалтын эхэнд сайд Н.Учрал Төрийн өмчит компаниудын Менежментийн шинэчлэл, өмчийн өөрчлөлтийг хэрэгжүүлэхэд дэмжлэг үзүүлэх техник туслалцааны (SMART TA) төслийг хэрэгжүүлэх ЗГХЭГ-ын саналыг Европын сэргээн босголт, хөгжлийн банк хүлээн авч, дэмжин хамтран ажиллаж байгаад талархаж буйгаа илэрхийлэв.
Хамтын ажиллагааны хүрээнд нэн тэргүүнд одоогийн хэрэгжүүлж буй SMART TA төсөл, Төрийн өмчит компанийн тухай болон төрийн өмчийн оролцоотой компанийн тухай хуулийн төслийн үзэл баримтлалд санал зөвлөмж өгөх ажлыг эрчимжүүлэх шаардлагатай байгаа юм. Мөн хуулийн үзэл баримтлалыг олон улсын зөвлөмж, стандартуудтай нийцүүлэхийн тулд Эдийн засгийн хамтын ажиллагаа ба хөгжлийн байгууллага зэрэг олон улсын байгууллагатай хамтран ажиллаж, эдгээр байгууллагаас хуулийн төсөлд зөвлөмж авах, бусад улсын сайн туршлагыг судалж бенчмарк тогтоох тал дээр идэвхтэй, дэмжиж ажиллахыг хүсэж буйгаа сайд илэрхийллээ.
Европын сэргээн босголт, хөгжлийн банкны суурин төлөөлөгч Ханнес Такач Н.Учрал сайдыг хүлээн авч уулзаж буйд талархал илэрхийлээд, SMART TA төслийн ажлыг эрчимжүүлэх, үр дүнтэй хэрэгжүүлэхэд анхаарахаа илэрхийлэв.
Монгол Улс анх 2000 онд ЕСБХБ-ны гишүүнээр элссэн бөгөөд 2006 онд тус банк дахь гишүүнчлэлийнхээ статусыг нэмэгдүүлж зээлжих эрхтэй гишүүн болсон. Тус банкнаас өнөөг хүртэл нийт 2.1 тэрбум еврогийн урт хугацааны шууд хөрөнгө оруулалт болон зээлийн санхүүжилтийг уул уурхай, уул уурхайн бэлтгэн нийлүүлэлт, сэргээгдэх эрчим хүч, хүнсний үйлдвэрлэл, аж үйлдвэр, дэд бүтэц, зам тээвэр, эрүүл мэнд, жижиглэнгийн худалдаа, банк санхүүгийн болон бусад үйлдвэрлэл үйлчилгээний салбарын нийт 131 төсөлд олгосон. Үүнээс 90%-ийг хувийн хэвшлийн хөрөнгө оруулалт эзэлж байна. 2023 оны 06-р сарын байдлаар нийт 50 төсөл идэвхтэй хэрэгжиж байна.
Монгол Улсын Тэргүүн шадар сайд Л.Гантөмөр “Монгол Улсын хөгжлийн 2025 оны төлөвлөгөө батлах тухай” УИХ-ын тогтоолын төслийг өнөөдөр УИХ-ын дарга Д.Амарбаясгаланд өргөн барилаа.
“Монгол Улсын хөгжлийн 2025 оны төлөвлөгөө”-г “Алсын хараа-2050” Монгол Улсын урт хугацааны хөгжлийн бодлого, “Шинэ сэргэлтийн бодлого”, “Бүсчилсэн хөгжлийн үзэл баримтлал”-д нийцүүлэн “Монгол Улсыг 2021-2025 онд хөгжүүлэх таван жилийн үндсэн чиглэл”, “Засгийн газрын 2024-2028 оны үйл ажиллагааны хөтөлбөр” зэрэг дунд хугацааны хөгжлийн төлөвлөлтийн баримт бичгүүдэд тусгагдсан зорилго, зорилттой уялдуулан Монгол Улсын Ерөнхийлөгч, Засгийн газраас санаачилсан “Хүнсний хувьсгал” хөтөлбөр, “Цагаан алт” үндэсний хөтөлбөр, “Монголд зочлох жил”, “Залуучуудын жил”, “Шинэ хоршоо-Чинээлэг малчин”, “Атар-IV тариалангийн тогтвортой хөгжлийн аян”-ы хэрэгжилтийг эрчимжүүлэхэд чиглэсэн нэн тэргүүнд хэрэгжүүлэх бодлогын төсөл, арга хэмжээнүүдийг тусгасан.
Хамтарсан Засгийн газрын “ХУРДТАЙ ХӨГЖЛИЙН ТӨЛӨӨХ ЗОРИГ” гэрээг удирдлага болгон “Монгол Улсын хөгжлийн 2025 оны төлөвлөгөө”-г Эдийн засаг, Бүсчилсэн хөгжил, Хүний хөгжил, Хүний эрхийг дээдэлсэн засаглалын гэсэн 4 үндсэн бодлогын тэргүүлэх чиглэлийн хүрээнд “УРТ ХУГАЦААНЫ ТОГТВОРТОЙ ХӨГЖЛИЙГ ХАНГАХ СУУРИЙГ БЭХЖҮҮЛЭХ” зорилгыг тодорхойлж, дэд бүтэц, бүтээн байгуулалтын 14 мега төсөл, тогтвортой хөгжлийг хурдасгах 149 төслийн хэрэгжилтийг эрчимжүүлж, салбарын реформуудыг хэрэгжүүлэхээр төлөвлөлөө.
Эдийн засгийн бодлогын хүрээнд урт хугацааны тогтвортой хөгжлийн суурь дэд бүтцийг бий болгох 14 мега төслийг 2025 онд багтааж бүрэн эхлүүлнэ.
Монгол Улсын Засгийн газрын Хэрэг эрхлэх газар, Бүгд Найрамдах Солонгос Улсын Олон Улсын Хамтын Ажиллагааны Байгууллага (КОЙКА) хамтран “Төрийн албаны гүйцэтгэлийн удирдлагын тогтолцоог бэхжүүлэх нь (2023-2025)” төслийг хэрэгжүүлж байна.
Төслийн хүрээнд Төрийн албаны хүний нөөцийн удирдлагын чадавхыг бэхжүүлэх, Удирдах ажилтнуудын манлайлал, удирдах чадварыг нэмэгдүүлэх, Төрийн жинхэнэ албан хаагчдын гүйцэтгэлийн удирдлагын тогтолцоог сайжруулах чиглэлээр Монгол Улсын төрийн албанд гүйцэтгэлийн удирдлагын нэгдсэн цахим системийг хөгжүүлэх, төрийн албан хаагчийн сургалтад ашиглах гарын авлага, сургалтын материалыг боловсруулах зэрэг ажлууд хийгдэж байгаа юм.
ЗГХЭГ-ын дэд дарга Б.Батцэцэг өнөөдөр (2024.09.26) төслийг хэрэгжүүлэгч БНСУ-ын тал болох KDS-ийн төлөөллийг хүлээн авч уулзан, төслийн гүйцэтгэлийн явцтай танилцаж, цаашид төлөвлөгдсөн арга хэмжээ, ажлын талаар санал солилцлоо. Төслийн явцыг тайлагнах 7-р уулзалтад Засгийн газрын хүний нөөцийн газрын дарга П.Сарангэрэл, Төслийн ерөнхий менежер Пак Кюнг Бэ болон бусад албаны хүмүүс оролцов.
Нээлттэй Засгийн Түншлэлийн Үндэсний зөвлөлийн зургаадугаар хуралдаан өнөөдөр (2024.09.26) төрийн ордонд боллоо. Монгол Улс “Нээлттэй засгийн түншлэл”-д нэгдээд 11 жил болж байгаа бөгөөд түншлэлийн хүрээнд Үндэсний үйл ажиллагааны төлөвлөгөөг дөрвөн удаа хэрэгжүүлж, өдгөө тав дахь төлөвлөгөөгөө баталж, тус төлөвлөгөөний хэрэгжилтийн явцыг өнөөдөр танилцууллаа.
🔘 ЗГХЭГ-ын дарга Н.Учрал хуралдааныг нээж хэлсэн үгэндээ “Үндэсний үйл ажиллагааны дөрөвдүгээр төлөвлөгөөний хүрээнд төрийн үйлчилгээг цахимжуулж иргэдэд хүртээмжтэй болгох үүрэг амлалт нь хамгийн амжилттай хэрэгжсэн. Мөн Шилэн ажиллагааны үр дүнд Засгийн газрын тусгай сангуудын эргэн төлөлт эрс сайжирч, 2023 оны жилийн эцсийн мэдээллээр гэхэд 91.6 тэрбум төгрөгийн эргэн төлөлт хийгдсэн байна.
🔘Олны анхааралд өртсөн сангуудаас дурдвал:
– Боловсролын зээлийн сан 3.9 тэрбум төгрөг
– Жижиг, дунд үйлдвэрлэлийг хөгжүүлэх сан 55.9 тэрбум төгрөг
– Хөдөлмөр эрхлэлтийг дэмжих сан 20.1 тэрбум төгрөг
– Хөдөө аж, ахуйн корпорац 11.2 тэрбум төгрөг төлөгдсөн
🔘 Монгол Улсын Засгийн газрын санал, санаачилга, төр хувийн хэвшлийн идэвхтэй үйл ажиллагаа, иргэдийн оролцооны ачаар Монгол Улс НҮБ-аас хоёр жил тутам шинэчлэн гаргадаг “Цахим засаглалын хөгжлийн индекс”-ээр 2022 онд энэ үзүүлэлтээр 74 дүгээр байранд байсан бол 2024 онд 28 байр урагшилж 46-р байранд орсон.
🔘Түүнчлэн цахим оролцооны индексээр 193 орноос 37 дугаар байрт жагсаж 2022 оны үзүүлэлтийг 20 байраар урагшлуулсан амжилт гаргасан. Дэлхийн улс орнуудын засгийн газрууд цахим шилжилт, нээлттэй мэдээллийн талаар идэвхтэй ажиллаж буй энэ цаг үед Монгол Улс ийм амжилт гаргасан нь бахархалт үйл явдал юм” гэдгийг онцлов.
🔘Хуралдаанд Нээлттэй засгийн түншлэлийн Улс орныг дэмжих албаны дарга Алонсо Сердан болон Ази, Номхон далайн бүсийн ахлах зохицуулагч Деви Барнас нар болон ЗГХЭГ, яамдын төрийн нарийн бичгийн дарга нар, Монголын үндэсний худалдаа, аж үйлдвэрийн танхим, Төрийн бүтээмжийн Үндэсний хорооны төлөөллүүд оролцов.