Чухал мэдээ – Page 45

МОНГОЛ УЛСЫН ЕРӨНХИЙ САЙД Л.ОЮУН-ЭРДЭНЭ БНХАУ-ЫН ТӨРИЙН ЗӨВЛӨЛИЙН ЕРӨНХИЙ САЙД ЛИ КӨЧЯНТАЙ ЦАХИМ УУЛЗАЛТ ХИЙВ

Монгол Улсын Ерөнхий сайд Л.Оюун-Эрдэнэ БНХАУ-ын Төрийн зөвлөлийн Ерөнхий сайд Ли Көчянтай 2021 оны 10 дугаар сарын 12-ны өдөр цахим уулзалт хийв.

Уулзалтын үеэр Ерөнхий сайд нар улс төр, худалдаа, эдийн засаг болон цар тахлын үеийн хамтын ажиллагаа зэрэг өргөн хүрээний олон асуудлаар санал солилцож, Монгол, Хятадын Иж бүрэн стратегийн түншлэлийн харилцааг өргөжүүлэн хөгжүүлэхээ нотлов.
Ерөнхий сайд Л.Оюун-Эрдэнэ дэлхий нийтийг хамарсан “Ковид-19” цар тахлын амаргүй цаг үед хоёр улс мөнхийн хөршийн сэтгэлээр харилцан бие биеэ дэмжин, олон улсад жишиг болохуйцаар хамтран ажиллаж буйг онцлон тэмдэглэж, БНХАУ-ын Засгийн газраас Монгол Улсын цар тахалтай тэмцэх үйл ажиллагаанд дэмжлэг үзүүлж ирсэнд талархал илэрхийлэв.

Ерөнхий сайд нар хоёр улсын худалдаа, эдийн засгийн хамтын ажиллагааг улам бүр гүнзгийрүүлж, шинэ шатанд гаргах боломжтойг онцлон тэмдэглэж, хамтран хэрэгжүүлэх боломжтой зарим томоохон төслийн талаар санал солилцов. Хоёр улсын худалдааны эргэлтийг 10 тэрбум ам.долларт хүргэх зорилтын төлөө хоёр талын холбогдох байгууллагууд идэвхтэй ажиллах талаар санал нэгдлээ. Энэ хүрээнд халдвар хамгааллын арга хэмжээг сайжруулсны үндсэн дээр худалдааны голлох бүтээгдэхүүн болох нүүрсний экспортын хэмжээг нэмэгдүүлж, аж ахуйн нэгжүүд нүүрс худалдан авах урт хугацааны гэрээ байгуулахыг дэмжиж ажиллахаа илэрхийлэв. Өнөөдрийн байдлаар Гашуунсухайт хилийн боомтод саатсан нүүрсийг яаралтай татан авах тохиролцоонд хүрлээ. Түүнчлэн Тяньжин боомтод саатаад байгаа Монголын 4575 чингэлэг ачааг өвлөөс өмнө шуурхай шийдвэрлэхээр боллоо.

Ерөнхий сайд Л.Оюун-Эрдэнэ хоёр улсын худалдааны эргэлт, эдийн засгийн хамтын ажиллагааг идэвхжүүлэхэд авто зам, төмөр замаар харилцан холбогдох нь чухал болохыг тэмдэглэж, Гашуунсухайт-Ганцмод, Бичигт-Зүүнхатавч, Ханги-Мандал, Шивээхүрэн-Сэхээ чиглэлийн төмөр замын бүтээн байгуулалтыг эрчимжүүлэх чиглэлээр идэвхтэй хамтран ажиллах санал дэвшүүлэв. Хоёр тал Гашуунсухайт-Ганц мод боомтын төмөр замын хоёр улсын хил огтлолын цэгийг эцэслэн тохирч, холбогдох боомтуудад ногоон гарц нээх ажлыг идэвхжүүлэхээр санал нэгдлээ.

Уур амьсгалын өөрчлөлтийн эсрэг байгаль орчны хамтын ажиллагааг гүнзгийрүүлэхийн чухлыг Ерөнхий сайд нар тэмдэглэж, хоёр улсын төрийн тэргүүн нарын тохиролцсоны дагуу цөлжилт, шар шороон шуургатай тэмцэх томоохон төслийг хамтран хэрэгжүүлэхэд хоёр улсын Засгийн газар идэвхтэй хамтран ажиллахаа илэрхийлэв.

Хөрш улсын хувьд Хятадын зүгээс манай улсын өмнөд бүсэд сэргээгдэх эрчим хүч үйлдвэрлэх, экспортлох боломж бүрдүүлэхэд хамтран ажиллахаар санал солилцлоо.

Нийслэл Улаанбаатар хотыг ухаалаг хот болгох, автозамын түгжрэл бууруулахад чиглэсэн төслүүдэд Хятадын талаас хувийн хэвшлийн аж ахуйн нэгжүүдийг идэвхтэй оролцуулах талаар хамтран ажиллахаа илэрхийлэв.

Ерөнхий сайд нар “Монгол, Орос, Хятадын эдийн засгийн коридор байгуулах хөтөлбөр”-ийг урагшлуулахад анхаарал хандуулж ажиллахаа нотоллоо.

Талууд хоёр улсын бүс нутаг, олон талт механизмуудын хүрээн дэх ойр дотно хамтын ажиллагааг үргэлжлүүлэхийн төлөө байгаагаа илэрхийлэв.

Ерөнхий сайд нар цаашид ч ажил төрийн ойр хэлхээ холбоотой байж, хоёр талын тааламжтай үед биечлэн уулзахаар тохиролцов.

Засгийн газрын Хэвлэл мэдээлэл, олон нийттэй харилцах газар

2021-10-12/0 сэтгэгдэл/by cabinetAdmin

Мэдээ, онцлох мэдээ, Чухал мэдээ

ХУУЛИЙН ТӨСӨЛД САНАЛ АВЧ БАЙНА

Засгийн газрын Хэрэг эрхлэх газраас боловсруулсан “Төрийн болон орон нутгийн өмчийн тухай хуулийн шинэчилсэн найруулгын төсөл”-д санал авч байна.

Саналаа turbat@cabinet.gov.mn хаягаар болон бичгээр Засгийн газрын Хэрэг эрхлэх газарт хандан ирүүлнэ үү.

Холбоо барих утас: 262958

2021-10-06/0 сэтгэгдэл/by cabinetAdmin

Мэдээ, онцлох мэдээ, Чухал мэдээ

ЗӨВЛӨХ ҮЙЛЧИЛГЭЭНИЙ ЗАР

Зөвлөх үйлчилгээ: Шилжилт хөдөлгөөний бодлогын зөвлөх

Байршил: Улаанбаатар хот, Монгол улс

Үргэлжлэх хугацаа: 6 сар Эхлэх хугацаа:

2021 оны 10 дугаар сар

Танилцуулга

Хөгжлийн бодлого, төлөвлөлт, түүний удирдлагын тухай хуулийг Монгол Улсын Их Хурлын 2020 оны 5 дугаар сарын 7-ны өдөр шинэчлэн баталж, хөгжлийн бодлого, төлөвлөлтийн тогтолцоо, оролцогчдын эрх үүргийг тодорхой болгож, бодлого боловсруулах, төлөвлөх, үр дүнтэй хэрэгжүүлэх, биелэлтэд хяналтшинжилгээ хийх механизмыг шинэчлээд байна. Түүнчлэн Монгол Улсын Их Хурлын 2020 оны 5 дугаар сарын 13-ны өдрийн 52 дугаар тогтоолоор “Алсын хараа-2050”, 8 дугаар сарын 28-ны өдрийн 23 дугаар тогтоолоор “Монгол Улсыг 2021-2025 онд хөгжүүлэх таван жилийн үндсэн чиглэл”-ийг тус тус батлан хэрэгжүүлж байгаа билээ. Харин дунд хугацааны буюу 10 жилийн хөгжлийн бодлогын баримт бичиг нь дараах долоон чиглэлээр хөгжлийн зорилтот хөтөлбөр байхаар хуульчлагдсан. Үүнд: Хүний хөгжлийн зорилтот хөтөлбөр; Нийгмийн хөгжлийн зорилтот хөтөлбөр; Эдийн засгийн болон дэд бүтцийн хөгжлийн зорилтот хөтөлбөр; Байгаль орчны зорилтот хөтөлбөр; Засаглалын зорилтот хөтөлбөр; Бүсийн хөгжлийн зорилтот хөтөлбөр; Үндэсний өрсөлдөх чадварыг нэмэгдүүлэх зорилтот хөтөлбөр юм. Монгол Улсын Засгийн газар эдгээр хөтөлбөрийн төслийг 2022 оны 6 дугаар сард багтаан боловсруулж, Улсын Их Хуралд өргөн мэдүүлэхээр төлөвлөж байна. Дээрх хөгжлийн хөтөлбөрийн төслийг боловсруулахад хүн амын тогтвортой өсөлтийг хангах, иргэдийн урт удаан, эрүүл энх, бүтээлчээр амьдрах, хөгжих таатай орчныг бүрдүүлэх, хувь хүн болон гэр бүлийн амьдралын чанарыг дээшлүүлэх, хүн амын шилжилт хөдөлгөөнийг зохистой түвшинд байлгах талаар салбар дамнасан асуудлыг судалж, эдгээр хөтөлбөрүүдэд тусгах нь чухал ач холбогдолтой билээ. Энэхүү зөвлөх үйлчилгээний зорилго нь дунд хугацааны буюу хөгжлийн зорилтот хөтөлбөрүүд болон Хөгжлийн бодлого, төлөвлөлт, түүний удирдлагын тухай хууль, Алсын хараа 2050-урт хугацааны бодлогын хүрээнд батлагдан гарах бусад бодлогын баримт бичгүүдэд шилжилт хөдөлгөөний асуудлуудлыг зохистойгоор тусгах, холбогдох арга зүйн зөвлөмжөөр хангах, шаардлагатай судалгаа шинжилгээг гүйцэтгэх юм.

Үүрэг хариуцлага:

1. Үндэсний, бүс орон нутгийн болон салбарын хэмжээнд хүчин төгөлдөр мөрдөгдөж буй бодлого, хууль эрх зүй, төлөвлөлтийн баримт бичгүүдтэй танилцах, холбогдох журам, зааварт үндэслэн хүн амны шилжилт хөдөлгөөний асуудлын хүрээнд бодлогын зорилго, зорилт, үр дүн, шалгуур үзүүлэлт, зорилтот түвшинг тодорхойлох;

2. Хууль эрх зүй, бодлогын орчин, тоон мэдээлэл зэрэгт дүн шинжилгээ хийж, тэдгээрийн зөрүүтэй байдлыг тодорхойлох;

3. Үндэсний, салбарын болон аймаг, орон нутгийн түвшинд шилжилт хөдөлгөөний одоогийн байдлыг судалж, танилцуулах;

4. Шилжилт хөдөлгөөний ирээдүйн загвар, төсөөллийг тодорхойлох, хувилбар боловсруулах;

5. Шилжилт хөдөлгөөний олон улсын шаардлага, туршлагыг судалж, танилцуулах;

6. Монгол Улсын дунд хугацаанд (10 жил) хэрэгжих Хөгжлийн зорилтот хөтөлбөрийг Монгол Улсын урт хугацааны хөгжлийн бодлого болон үндэсний, салбарын, салбар дундын түвшинд хүчин төгөлдөр мөрдөгдөж байгаа бодлогын баримт бичгүүдтэй уялдуулан шинжлэх ухааны үндэслэлтэй боловсруулахад дэмжлэг үзүүлэх;

7. Олон улсын шилжилт хөдөлгөөний байгууллага болон бусад холбогдох талуудтай хамтран шилжилт хөдөлгөөнийг үндэсний, салбарын, орон нутгийн хөгжлийн бодлогод тусгах талаарх Үйл ажиллагааны төлөвлөгөөг боловсруулах, хэрэгжилтийг зохион байгуулах;

8. Холбогдох бүхий л судалгаа, шинжилгээ, баримт нотолгоонд үндэслэн шилжилт хөдөлгөөний талаарх бодлогын үзэл баримтлалыг боловсруулах;

9. Баримт бичгийн боловсруулалтад салбар дундын бусад асуудлууд (хүний эрх, жендэрийн тэгш байдал, бүсийн хөгжил, дэд бүтцийн хөгжил, хөдөлмөр эрхлэлт, засаглал, дотоодын болон олон улсын шилжилт хөдөлгөөний удирдлага, зохицуулалт гэх мэт)-г уялдуулан тусгах;

10. Монгол Улсын дунд хугацааны Хөгжлийн зорилтот хөтөлбөрийн боловсруулалтын явцад холбогдох байгууллагуудад дэмжлэг үзүүлэх, загвар, хяналтын хуудас боловсруулах;

11. Алсын хараа 2050, Тогтвортой хөгжлийн зорилт 2030, Аюулгүй, цэгцтэй, зөрчилгүй шилжилт хөдөлгөөний дэлхийн компакт гэрээ (Global Compact for Migration) хоорондын уялдааг хангах;

12. Шаардлагатай хурал, уулзалт, зөвлөгөөнийг зохион байгуулах;

13. ЗГХЭГ-н Бодлого төлөвлөлтийн газар болон ОУШХБ-с даалгасан бусад үүрэг даалгаварыг шуурхай, тасралтгүй гүйцэтгэх.

Шаардлагатай туршлага, ур чадвар:

-Математик, статистик, загварчлал, эдийн засаг, хүн ам зүй, төрийн бодлого, төрийн захиргаа, улс төр судлал болон бусад холбогдох чиглэлээр магистрын зэрэгтэй байх;

-Хөгжлийн бодлого төлөвлөлт, зохицуулалт, бодлогын судалгаа, хяналт-шинжилгээ үнэлгээ, систем сэтгэлгээ болон бусад чиглэлээр нийт 5-аас доошгүй жилийн ажлын туршлагатай. Үүнээс шилжилт хөдөлгөөний чиглэлээр ажиллаж байсан бол давуу тал болно;

-Математик, загварчлал хийж байсан туршлагатай;

-Тогтвортой хөгжлийн зорилтууд болон үндэсний хөгжлийн бодлого, зорилго, зорилтуудын талаар мэдлэгтэй байх;

-Холбогдох хууль, дүрэм журам судалж, дүн шинжилгээ хийх чадвартай;

-Mонгол хэлний ярианы болон бичгийн өндөр ур чадвартай байх. Англи хэлтэй бол давуу тал болно. Бүрдүүлэх материал: Сонгогдсон зөвлөх нь Засгийн газрын Хэрэг эрхлэх газрын Бодлого, төлөвлөлтийн газар болон Олон Улсын Шилжилт Хөдөлгөөний Байгууллагын удирдлага, чиглэлийн хүрээнд ажлын хэсгийн бусад зөвлөхүүдтэй хамтран бүтэн цагаар ажиллана.

– Ажлын намтар (CV), уг ажлыг гүйцэтгэх сонирхолоо илэрхийлсэн нэг хуудаст багтаасан захидал (cover letter)-г Англи болон Монгол хэл дээр бэлтгэн iomubadminhr@iom.int гэсэн хаягаар 2021 оны 10 сарын 6-ны дотор цахимаар ирүүлнэ үү.

-Имэйлийнхээ гарчиг хэсэгт “Application for Migration expert” гэж бичнэ үү. Хугацаа хэтэрсэн өргөдлийн материалыг хүчингүйд тооцно. Зөвхөн хураангуй жагсаалтад багтсан өргөдөл гаргагчидтай холбоо барина.

2021-09-28/0 сэтгэгдэл/by cabinetAdmin

Мэдээ, Чухал мэдээ

JDS ХӨТӨЛБӨР ЗАРЛАГДЛАА

“Хүний нөөцийг хөгжүүлэх JDS тэтгэлэгт хөтөлбөр” нь Япон Улсын Засгийн газрын буцалтгүй тусламжаар хэрэгжиж буй Монгол Улсын хөгжилд хувь нэмэр оруулах залуу төрийн албан хаагчдыг Япон Улсын их, дээд сургуулийн магистр, докторын түвшинд суралцуулдаг тэтгэлэгт хөтөлбөр юм.

Тус хөтөлбөр нь 2021 оны 9-р сарын 1-ний өдрөөс шинэ элсэлтээ зарласан байна.

Дэлгэрэнгүй мэдээллийг https://jds-scholarship.org/country/mongolia/index.html вэб сайтаас авна уу.

2021-09-10/0 сэтгэгдэл/by cabinetAdmin

Мэдээ, онцлох мэдээ, Чухал мэдээ

“Энтерпрайз архитектурын сургагч багш бэлтгэх” цахим сургалт зохион байгуулагдаж байна

Засгийн газрын Хэрэг эрхлэх газрын захиалгаар Дэлхийн банкны санхүүжилтээр “Ухаалаг засаг” төслийн хүрээнд “Төрийн энтерпрайз архитектур болон Өгөгдөл солилцооны нэгдсэн тогтолцоо” дэд төслийг хэрэгжүүлж байна.

Уг төслийн хүрээнд “Энтерпрайз архитектурын сургагч багш бэлтгэх” цахим сургалтыг 2021 оны 6 дугаар сарын 22-25-ны өдрүүдэд зохион байгуулж байна.

Зорилго

Сургагч багш бэлтгэх сургалтын зорилго нь энтерпрайз архитектурын талаар цогц ойлголт өгөх, “Монгол Улсын Төрийн Энтерпрайз Архитектур”-ын бүтэц зохион байгуулалт, хэрэгжүүлэх үе шат, үйл ажиллагааны талаар дэлгэрэнгүй мэдлэг олгох, ТЭА-ыг хэрэгжүүлэх, нэвтрүүлэх мэргэжилтнүүдэд зориулж сургалт зохион байгуулах чадвар эзэмшүүлэхэд оршино.

Зорилт

Энтерпрайз архитектурын онолын талаар цогц ойлголт өгөх
Монгол Улсын төрийн энтерпрайз архитектурын тогтолцооны талаар мэдлэг олгох
Төрийн энтерпрайз архитектурын платформ дээр ажиллах дадлага туршлага олгох
Төрийн энтерпрайз архитектор бэлтгэх хөтөлбөр боловсруулах мэдлэгтэй болгох.

Сургалт нь дараах 5 сэдвийн хүрээнд явагдана. Үүнд:

Энтерпрайз архитектур, цар хүрээ, олон улсын чиг хандлага;
Монгол Улсын төрийн энтерпрайз архитектур, түүний бүтэц зохион байгуулалт, мета загвар;
Бизнес, аппликейшн, дэд бүтэц, өгөгдөл, аюулгүй байдал, стандартын архитектур;
Монгол Улсын төрийн энтерпрайз архитектурын платформын бүтэц, зохион байгуулалт, түүний ашиглалт (цуглуулсан мэдээлэл, дүн шинжилгээ хийх, хувилбар, зорилтот архитектур болон цаашид хэрэгжүүлэх замын зургийг гаргах г.м.);
Сургагч багш бэлтгэх хөтөлбөр, сургалтын агуулга, сургалтын материалтай танилцах.

Сургалтад Засгийн газрын Хэрэг эрхлэх газар, Харилцаа холбоо, мэдээллийн технологийн газар, Үндэсний хөгжлийн газар, Удирдлагын академийн холбогдох мэргэжилтнүүд оролцож байна.

2021-06-22/0 сэтгэгдэл/by cabinetAdmin

Мэдээ, онцлох мэдээ, Чухал мэдээ

“МОНГОЛ УЛСЫН ЗАСГИЙН ГАЗРЫН 100 ХОНОГ” АЖЛЫН ТАЙЛАН

“Монгол Улсын Засгийн газрын 100 хоног” ажлын тайлантай энд дарж танилцана уу.

2021-05-17/0 сэтгэгдэл/by cabinetAdmin

Мэдээ, онцлох мэдээ, Чухал мэдээ

“ТӨРИЙН АЛБАНЫ ОНЛАЙН СУРГАЛТЫН ПЛАТФОРМ ХӨГЖҮҮЛЭХ” АЖИЛД СОНИРХОЛ ИЛЭРХИЙЛЭХ ХҮСЭЛТЭЭ ИРҮҮЛЭХИЙГ УРЬЖ БАЙНА

Монгол Улс: “Ухаалаг засаг” төсөл

Төслийн дугаар: 5483-MN

Зөвлөх үйлчилгээний нэр: Төрийн албаны онлайн сургалтын платформ хөгжүүлэх.

Зөвлөх үйлчилгээний дугаар: CQS-2.5.6

Монгол Улсын Засгийн газар Дэлхийн банкны санхүүжилтээр “Ухаалаг засаг” төслийг хэрэгжүүлж байгаа бөгөөд тус төслийн хүрээнд дор дурдсан зөвлөх үйлчилгээг гүйцэтгүүлэхээр төлөвлөж байна.

Зөвлөх үйлчилгээний зорилго нь Төрийн албаны онлайн сургалтын платформыг хөгжүүлж хүлээлгэн өгнө.

Монгол Улсын Засгийн газрын Хэрэг эрхлэх газар зөвлөх үйлчилгээг гүйцэтгэх сонирхолтой эрх бүхий зөвлөх компанийг сонирхлоо илэрхийлэхийг урьж байна. Сонирхож буй байгууллага уг үйлчилгээг гүйцэтгэх чадвар, туршлагатайгаа нотлох мэдээллийг ирүүлнэ.

Шалгуурын хураангуй:

Сүүлийн 3 жилийн (2018 оны 1 дүгээр сараас тооцох) хугацаанд цахим сургалтын систем хөгжүүлж нэвтрүүлсэн 1 гэрээг амжилттай хэрэгжүүлсэн байна. (Нотлох баримт гэрээний хувь, ажил хүлээлцэх акт ирүүлнэ.)
Сүүлийн 3 жилийн (2018 оны 1 дүгээр сараас тооцох) хугацаанд вэб дээр суурилсан систем болон мобайл аппликэшн хөгжүүлж нэвтрүүлсэн 2 гэрээг амжилттай хэрэгжүүлсэн байна. (Нотлох баримт гэрээний хувь, ажил хүлээлцэх акт ирүүлнэ.)

Ажлын даалгаврын англи хувилбарыг энд, монгол хувилбарыг энд дарж үзнэ үү.

“Олон улсын сэргээн босголт, хөгжлийн банкны зээл, Олон улсын хөгжлийн агентлагийн хөнгөлөлттэй зээл, тусламжийн хүрээнд Дэлхийн банкны зээлдэгчид зөвлөх сонгон шалгаруулах, ажиллуулах журмын 1.9 дүгээрт заасан ашиг сонирхлын зөрчлийн талаарх Дэлхийн банкны бодлогыг анхаарч уншихыг хүсье.

Зөвлөхийг сонгон шалгаруулахдаа дээр дурдсан Дэлхийн банкны зөвлөх сонгон шалгаруулах журамд заасан хосолмол үнэлгээний аргыг ашиглана.

Сонирхол илэрхийлэх хүсэлтээ доор дурдсан хаягаар 2021 оны 5 дугаар сарын 14-ний өдрийн 11 цагаас өмнө цаасан эсвэл цахим хувилбараар ирүүлнэ үү.

Зөвлөх үйлчилгээг 3 сарын хугацаанд Улаанбаатар хотод хийж гүйцэтгэнэ.

Даваа – Баасан гаригт (бүх нийтийн амралтын өдрөөс бусад өдрүүдэд) Улаанбаатарын цагаар 09.00-16.00 цагийн хооронд дор дурдсан хаягаар холбогдож дэлгэрэнгүй мэдээллийг авна уу:

Хаяг: Чингэлтэй дүүрэг, Засгийн газрын 2Б байр, Үндэсний хөгжлийн газар 303 тоот

Ажилтны нэр: Д.Соёл-Эрдэнэ

Утас: +976-51264870

Цахим шуудангийн хаяг: procurement@smart.gov.mn

2021-04-30/0 сэтгэгдэл/by cabinetAdmin

Мэдээ, онцлох мэдээ, Чухал мэдээ

“Үр дүнд суурилсан бодлого, төлөвлөлт, хяналт-шинжилгээ, үнэлгээ” сэдэвт цахим сургалт

Монгол Улсын Засгийн газрын Хэрэг эрхлэх газрын санаачлагаар Канад Улсын Засгийн газрын санхүүжилттэй MERIT төсөлтэй хамтран боловсруулсан “Үр дүнд суурилсан бодлого, төлөвлөлт, хяналт-шинжилгээ, үнэлгээ” сэдэвт цахим сургалтыг танилцуулж байна.

Энэхүү цахим сургалтад хамрагдснаар Засгийн газрын 2020 оны 206, 216, 217, 218 дугаар тогтоолоор батлагдсан журам болон Монгол Улсын сайд, Засгийн газрын Хэрэг эрхлэх газрын даргын 2020 оны 100 дугаар тушаалаар батлагдсан загвар, аргачлалтай танилцах боломжтой.

Та “Үр дүнд суурилсан бодлого, төлөвлөлт, хяналт-шинжилгээ, үнэлгээ” сэдэвт цахим сургалтын бүх сэдвүүдийг судалж, шалгалтыг амжилттай өгснөөр цахим гэрчилгээ авах нөхцөл бүрдэнэ.

Цахим сургалтын хаяг: http://surgalt.unelgee.gov.mn

2021-04-07/0 сэтгэгдэл/by cabinetAdmin

Мэдээ, онцлох мэдээ, Чухал мэдээ

ИННОВАЦИЙГ ДЭМЖИХ ХӨТӨЛБӨР ХЭРЭГЖИЖ ЭХЭЛЛЭЭ

Монгол Улс: “Ухаалаг засаг” төсөл 5483-MN

Төслийн нэр: Инновацийг дэмжих хөтөлбөр

Төслийн дугаар: CQS-2.3.2

Монгол Улсын Засгийн газрын Хэрэг эрхлэх газраас Дэлхийн банкны дэмжлэгтэйгээр хэрэгжүүлж буй “Ухаалаг засаг” төслийн Инновацийг дэмжих хөтөлбөрийн хүрээнд зарлаж буй инновацийн төслийн сонгон шалгаруулалтад оролцох сонирхолтой хувь хүн, баг, хуулийн этгээдийг урьж байна.

Инновацийг дэмжих хөтөлбөрийн зорилго нь нийгэмд тулгамдаж буй асуудлуудыг инноваци, мэдээллийн технологи ашиглан шинэ, шинэлэг арга замаар шийдвэрлэх шийдэл бүхий эмэгтэйчүүд, залуучуудын оролцоог хангасан төслийг сонгон шалгаруулж, хурдасгуур хөтөлбөрт хамруулан грант олгоход оршино.

Төсөл нь дараах шаардлагыг хангасан байна. Үүнд:

Монгол Улсын урт хугацааны хөгжлийн бодлого “Алсын хараа–2050”, Монгол Улсыг 2021-2025 онд хөгжүүлэх таван жилийн үндсэн чиглэл, Монгол Улсын Засгийн газрын 2020-2024 оны үйл ажиллагааны хөтөлбөр болон тэргүүлэх ач холбогдол бүхий салбаруудыг хөгжүүлэх чиглэлээр батлагдсан бусад бодлогын баримт бичгийн зорилтуудыг хангахад чиглэгдсэн, шинэлэг шийдэл, санал болгосон байх;
Тодорхой асуудлыг дэвшилтэт технологи, инноваци ашиглан, хэрэглэхэд хялбар, хэрэглэгчид ээлтэй программ хангамж хөгжүүлэх замаар шийдвэрлэх, шийдэл нь өмнө нь нэвтрээгүй байх;
Монгол Улсын хууль, тогтоомж болон Монгол Улсын элсэн орсон олон Улсын гэрээ конвенц, эрх зүйн баримт бичигтэй зөрчилдөхгүй байх;
Төсөл нь төрийн үйлчилгээтэй холбоотой бол программ хангамжийг www.e-mongolia.mn портал систем болон мобайл аппликейшнтэй холбох боломжтой байх.
Төсөл мэдүүлэгч нь дараах шалгуурыг хангасан байна. Үүнд:
Монгол Улсын иргэн байх;
Хувь хүн бол баг бүрдүүлэх;
Багт нэгээс доошгүй эмэгтэй үндсэн гишүүн байх.

Оролцох сонирхолтой хувь хүн, баг, хуулийн этгээд http://www.innovathon.mn хаягаар орж 2021 оны 3-р сарын 29-нөөс 4-р сарын 12-ны өдрийн хооронд бүртгүүлнэ үү.

Бүртгүүлсэн оролцогчдод зориулсан ИДХ-ийн танилцуулга, цахим сургалтыг бүртгэлийн хугацаанд хуваарь гарган мэдэгдэж зохион байгуулна. Хөтөлбөрт хамрагдах төслийн саналаа http://www.innovathon.mn/submit холбоосоор орж өгөгдсөн маягтын дагуу цахимаар бөглөж төслийн танилцуулгын 1 минутын видео бичлэгийн хамт 4-р сарын 12-ны өдрөөс 4-р сарын 15-ны дотор илгээнэ үү.

Шалгарсан төслүүдийн мэдээллийг 4 сарын 18-ны дотор холбогдох хаягаар мэдэгдэнэ.

Дэлгэрэнгүй мэдээлэлтэй www.innovathon.mn сайтаас танилцана уу.

Төсөл хэрэгжүүлэгч: “Шинэ эхлэх цэг” (Стартап Монгол) ТББ

Хаяг: Чингэлтэй дүүрэг, 6-р хороо, Багатойруу 49-р байр, 31 тоот

Холбоо барих: Б.Ихбаяр, Г.Төвшинзаяа

Утас: +976-89909924, +976-86778607

Цахим шуудангийн хаяг: info@innovathon.mn

Фэйсбүүк хаяг: Инновацийг дэмжих хөтөлбөр

2021-03-30/0 сэтгэгдэл/by cabinetAdmin

Мэдээ, онцлох мэдээ, Чухал мэдээ

БҮХ НИЙТИЙН БЭЛЭН БАЙДАЛД ШИЛЖҮҮЛЭХ ЭМЯ-НЫ САНАЛЫГ ДЭМЖИВ

Улсын онцгой комисс цахимаар хуралдаж дараах шийдвэрийг гаргалаа.

Коронавируст халдварын цар тахлын тархалт нэмэгдэж байгаатай холбогдуулан Эрүүл мэндийн яамнаас халдварын эсрэг авч хэрэгжүүлэх хариу арга хэмжээний төлөвлөгөөний саналаа танилцуулж хэлэлцүүлэв. Уг саналд 2021 оны 04 сарын 03-ны өдрөөс 04 сарын 18-ны өдөр хүртэл өдрүүдэд “Гамшгаас хамгаалах бүх нийтийн бэлэн байдал”, эрсдлийн УЛААН түвшинд шилжих тухай тусгажээ. УОК-оос тус саналыг дэмжиж, Монгол Улсын Засгийн газарт танилцуулахаар болов гэж Засгийн газрын Хэвлэл, мэдээлэлтэй харилцах газраас мэдээллээ.

2021-03-29/0 сэтгэгдэл/by cabinetAdmin

Холбоо барих

Байршил

Хэрэглэгч