“ТЭРБУМ МОД” ҮНДЭСНИЙ ХӨДӨЛГӨӨНИЙ ХҮРЭЭНД МОД ТАРИЛАА

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөнийг дэмжих, Шинэ Хархорум хотын ногоон байгууламж, ойн зурвас байгуулах ажлын хүрээнд Засгийн газрын Хэрэг эрхлэх газрын Дэд дарга У.Бямбасүрэн, Төрийн захиргааны удирдлагын газрын дарга Д.Балжинням, Бүс, орон нутгийн удирдлага зохицуулалтын газрын дарга П.Зоригтбаатар нарын бүрэлдэхүүнтэй 20 гаруй албан хаагч 2025 оны 06 дугаар сарын 05-ны өдөр Хархорин хотын цэцэрлэгт хүрээлэнд 200 мод тарилаа.

“Тэрбум мод” Үндэсний хөдөлгөөний хүрээнд Хархорум хотод 1.2 сая мод тарих юм. Тухайлбал, “Эрдэнэс Монгол” нэгдлийн харьяа “Эрдэнэс таван толгой” ХК 300.000 мод, “Эрдэнэт үйлдвэр” ТӨҮГ 150.000 мод, “Эрдэнэс критикал минерал” ХК 15.000 мод, “Шивээ овоо” ХХК 30.000 мод тарихаар тус тус төлөвлөн ажиллаж байна. Засгийн газрын Хэрэг эрхлэх газрын дээрх төлөөлөл ногоон байгууламж байгуулах ажлын явцтай танилцаж, төрийн байгууллага, албан хаагчдын дунд Шинэ Хархорум хотын ногоон байгууламж, ойн зурвас байгуулах ажилд манлайлал үзүүлж, хот байгуулах ажлын анхдагчийн нэг болсон нь онцлог байлаа.